Björn og Hákon áfram með Grindavík

Grindvíkingar eru þessa dagana að ganga frá leikmannasamningum og hafa þeir Björn Berg Bryde og Hákon Ívar Ólafsson framlengt sína samninga við félagið og munu þeir leika með liðinu í Pepsi- deildinni í knattspyrnu í sumar.

Björn Berg kom frá FH fyrir sumarið 2012, en hann er 25 ára gamall og hefur leikið allan sinn meistaraflokksferil með Grindavík og verið einn af burðarásum í vörn liðsins. Björn lék sextán leiki með Grindavík í Pepsi-deildinni í fyrra.

Hákon Ívar er 22 ára og uppalinn Grindvíkingur en var á lánssamningi hjá Haukum árið 2016, hann lék níu leiki í Pepsi-deildinni í fyrra.